Public Interest Journalism funded through NZ On Air
O le gagana Samoa, o se measina taua lea mo Miracle Fai’ilagi, a’o ia auai i Niu Sila ma le kalapu lakapi Moana Pasifika.
O le anavatau lea ua fa’a autu iai le fa’amanatuina o le vaiaso o le Gagana Samoa. O se fuaitau o lo’o fa’amalosia mai ai le feau taua ile fa’aogaina o le gagana i nofoaga faitele. Ma o se mataupu lea e malamalama lelei ai ia Miracle Fai’ilagi.
I le amataga o le tausaga, sa sainia aloia ai e le kalapu o le Moana Pasifika ia Fai’ilagi, i totonu o le ta’amilosaga o le Super Rugby Pacific. Ma o se matati’a lea i totonu o le tala fa’asolopito o le lakapi, i le avea ai o Fai’ilagi ma ulua’i tama ta’alo mai le Pasifika i totonu o lenei ta’amilosaga.
I lona masi’i mai ai i Niu Sila aua le fa’amoemoe ma le Moana Pasifika, sa ia le fa’agaloina ia aoaoga sa fa’avae ai lona olaga tuputupu a’e i Samoa. O se tasi o nei a’oa’oga sa fa’amalosia lea i totonu o le lotu. O le auai ai o ona matua ile kolisi fa’afaifeau i Piula, o i’ina sa amata ai le fa’avaeina o lona ola a’oa’oina i le gagana e ala i le autalavou, aoga aso sa ia ma isi mea fai i totonu o le lotu.
O se fiafiaga mo Fa’ilagi i lona auai ai i le Moana Pasifika, ua mafai ai ona ia fa’asoa ma talanoa ma nisi fo’i o uso e uiga i le aganu’u ma le gagana Samoa. Ua ia fa’aaogaina le gagana Samoa ma auala e fa’afaigofie ai feso’ota’iga ma nisi fo’i o alo a Samoa o lo’o latou ta’aalo fa’atasi. O le gagana Samoa fo’i, ua avea ma se auala feso’otaiga ma isi foi tagata Samoa o aumau i Niu Sila nei.
I le masina ua mavae, sa malaga ai ia le Moana Pasifika i Samoa aua le la ta’aloga ma le Queensland Reds. Ma o se avanoa taua lea mo Fa’ilagi e toe o’o i le nofoaga na amata mai ai lona olaga tuputupua’e.
E ui e le’i manuia ia taumafaiga a le Moana, ae sa va’aia le feiloa’i fiafia o Fai’ilagi ma nisi o ona aiga ma uo sa tapua’ia le latou taumafaiga. O se fiafiaga fo’i mo le to’atele o le atunu’u sa auai, ina ua ausia fa’alua le laina sikoa e Fai’ilagi. E ui i le malolo o le Moana Pasifika, ae o se manumalo mo tagata Samoa aua ia taumafaiga a se tasi o latou alo.
O le naunauta’iga a Fai’ilagi, ia avea o ia e fai ma fa’ata’ita’iga aua le fa’amalosia ma le fa’atauaina o le gagana Samoa i aso faiso’o. Ma o se tulaga lelei fo’i lona auai ai i atunu’u mamao e fai ma fa’ata’ita’iga i tupulaga Samoa sa fananau i fafo o Samoa.
Ua toe nei o le ta’aloga mulimuli a Moana ona mae’a ai lea o le ta’amilosaga mo lenei tausaga. E ui lava o tou sa’ili se latou malo, ae ua manino lava ia le avea o Fai’ilagi ma se tasi o tama ta’alo lelei mo lenei tausaga. I le iai ai fo’i lenei tausaga ma le ipu o le lalolagi, o le a avea Fai’ilagi ma se tasi o sui a le Manu Samoa pe a tofia.
